Blogue do Equipo de Dinamización da Lingua Galega do Colexio Lestonnac

Equipo de Dinamización da Lingua Galega

Portas aDentro 2020

Despedimos este anómalo curso 2019/2020 cunha edición especial da nosa revista: a número XXX. Premede aquí ou sobre a portada para acceder a ela.

Portas aDentro 2020 (Portada)

Esperamos que a do curso 2020/2021 sexa moito máis… aburrida :)


Acto das Letras Galegas 2020

Este ano non nos poderemos xuntar no salón para o noso tradicional Acto das Letras Galegas, pero iso non quere dicir que quedemos sen el. Será en formato virtual e reducido, pero puxémoslle as mesmas ganas de sempre.

O primeiro é rendirlle homenaxe ao autor. Aquí tedes unha pequena presentación que pretende resumir a achega que Ricardo Carvalho Calero fixo ás nosas letras e á nosa cultura:

Agora, unha sorpresa: o grupo Da Man, integrado polos nosos profesores Diego, Marta e Salva, interpreta esta adaptación aos tempos que corren do Adiós ríos, adiós fontes de Rosalía musicado por Amancio Prada, obra da violonchelista Alessandra Gallo. Aquí podedes atopar a letra para que cantedes con eles este himno:

E outra sorpresa máis. A crise da COVID tamén nos deixou sen maios este ano, pero Elena vaille poñer remedio. Aquí nos trae este, especialmente dedicado para o alumnado de 5º de Primaria:

E así rematamos este acto virtual. Que soe o noso himno! 🙂


Día do libro 2020 | #Euquedocogalego

Feliz Día do libro!

A situación na que nos atopamos fixo complicado este ano convocar un novo Concurso de marcapáxinas no que todo o mundo puidese participar.

Pero o Equipo de Dinamización da Lingua Galega e da Lectura quérevos agasallar igualmente cun marcapáxinas que reflicta o principal obxectivo da nosa tarefa: a normalización do noso idioma, é dicir, que o uso do galego volva ser habitual e espontáneo no noso centro e en todos aqueles espazos, públicos e privados, onde nos atopemos.

Por iso, para decorar o marcapáxinas deste ano, escollemos un dos lemas a prol do galego que hai algún tempo elaborou o alumnado de Secundaria. A súa autora foi Ciara Gayoso Das de 2º B, e dende o EDLGeL querémoslle transmitir os nosos parabéns.

Captura de pantalla 2020-04-22 a las 9 (2)

Premede aquí ou sobre as imaxes para descargar a plantilla que vos permitirá imprimir 4 marcapáxinas (hai que aproveitar a cartolina 😊) en formato pdf. Collede a tesoira e xa tedes o voso marcapáxinas feito na casa para quedar na casa… cun bo libro entre as mans.

Captura de pantalla 2020-04-22 a las 16.49.49

E aínda que non podades imprimilo (ao mellor andamos escasos de cartolina ou de tóner estes días 😅), animámosvos igualmente a compartir nas redes sociais as imaxes dos libros cos que estades a quedar na casa estes días coa etiqueta #Euquedocunlibro.


Candeloria 2020

Animádevos a participar!

Captura de pantalla 2020-01-14 a las 11.32.10

 

Podes consultar as bases premendo sobre a imaxe ou aquí.


Non é verán de Estrella Damm, A Canción d10z!

Xa temos canción gañadora!

Os maiores do noso colexio decidiron nomear como mellor canción en galego dos anos 10, é dicir, como A Canción d10z! Non é verán de Estrella Damm, dos coruñeses Ezetaerre.

Dezaseisavos (A canción d10z) (1) (2) (1) (2) (1) (1) (1) (4) (1).jpg

Hoxe, despois de votar unhas disputadísimas semifinais (que se decidiron, ambas, por unha marxe estreitíiiiisima) Corasón de carballo, dos Heredeiros da Crus e o tema gañador disputaron a final do noso certame, nunha última votación que remataba unha actividade que veu ocupando as sesións de titoría das seis últimas semanas.

Nela, o noso esixente xurado decidiu premiar á este temazo cheo de crítica social co que os Ezetaerre deron resposta en 2017 aos célebres anuncios estivais da marca de cervexas mediterránea do título.

E se o premio do xurado xa está outorgado, o do público aínda está por decidirse. O día de ano vello pecharemos a última das votacións que, de forma paralela, estamos propoñendo en Twitter. Animádevos a participar!

Terá a o mesmo resultado final? Para axudarvos a decidir, deixámosvos coa canción gañadora para os nosos rapaces e rapazas. Felices anos 20 a todos!


A Canción d10z! (Semifinais)

Xa queda pouco para coñecer cal é, para os maiores do noso cole, a canción d10z destes anos 10. Estamos en semifinais!

A rapazada vén de decidir que a 1ª semifinal enfronte o hip hop d’A Catapulta de Dios Ke Te Crew coa balada rock Corasón de carballo, dos Heredeiros da Crus.

 

A 2ª terá un carácter marcademente reivindicativo, urbano e xuvenil: os ponteareáns SonDaRúa co seu Liberando mentes ante os coruñeses Ezetaerre e o seu aviso de que  Non é verán de Estrella Damm.

Manterémosvos informados. A gran final agarda!

Dezaseisavos (A canción d10z) (1) (2) (1) (2) (1) (1).jpg


A Canción d10z (Cuartos de final)

Nós xa temos cuartos de final!

As nosas rapazas e os nosos rapaces votaron hoxe as eliminatorias de oitavos (por aquí temos que ir un chisco máis rápido, que o ano remátano antes 😜), e decidiron que os seus cuartofinalistas sexan Familia Caamagno, Dios Ke Te Crew, Eladio y Los Seres Queridos, Heredeiros da Crus, Skandalo GZ, SonDaRúa, Ezetaerre e Iván Ferreiro.

Dezaseisavos (A canción d10z) (1) (2) (1) (2) (1).jpg

Só quedan 8! Cal acabará sendo a nosa canción d10z?


A Canción d10z! (Oitavos de final)

Xa están configuradas as eliminatorias de oitavos de final d’A Canción d10z!

Despois de 4 semanas nas que o noso alumnado foi coñecendo as 32 cancións participantes e elixindo as súas primeiras favoritas, agora podedes ver cal é o seguinte paso no camiño que nos leva ata a canción (en galego) 10 dos anos 10:

Oitavos (Cadro alumnado)

Lembrade que se tedes conta de Twitter vós tamén podedes participar no noso xogo votando nesa rede social polas vosas favoritas. Só tedes que entrar na nosa conta (@xavedes) e seguir o noso fío de votacións. Alí, despois das primeiras votacións, o cadro quedou un pouco distinto:

Oitavos (Cadro Twitter).jpg

Animádevos a participar! Cales serán as nosas gañadoras?


Outras d10z! | Roger de Flor

Coas 8 últimas pezas que vos traemos esta semana xa está completa a nosa lista de trinta e dúas cancións 10. Trinta e dous temas do mellorciño da música en galego dos últimos dez anos de entre os que o noso alumnado elixirá ao seu favorito.

A pena que nos queda é non ter feito oco para máis. Porque por cancións e artistas non foi. Aid, Atrás Tigre, Arrhythmia, Bastards on Parade, Os Benignos, Budiño, Cuarta Xusta, Emilio José, Espiño, Festicultores Troupe, Grampoder, Guezos, Los Jinetes del Trópico, Medomedá, Mercedes Peón, Mounqup, Musel, Os da Ría, Pantis, Rodrigo Cuevas, Roger de Flor, The Skarnivals, Tanxugueiras, Zënzar… e tantos outros que poderían facilmente ter formado parte da nosa selección. Se ata nos dá rabia parar agora!

Por iso imos ir traendo ao noso blogue unha nova canción cada día de entre as que tivemos que deixar fóra do noso xogo, comezando coa que nos propón o propio Roger de Flor.

Dende aquí ao ladiño, dende Limodre, aí vai esta fermosura pop: Estoupará.

Estoupará
Roger de Flor
Apelón (2016)

(Podedes atopar esta canción, xunto coas 32 iniciais, na lista de reprodución d‘A Canción d10z! en Spotify)


Dezaseisavos de final: Novedades Carminha ou Boyanka Kostova?

Estádesvos divertindo co noso xogo? Pois coas cancións da nosa última eliminatoria de dezaseisavos ídelo facer todavía máis.

Novedades Carminha é probablemente a banda galega de maior éxito da actualidade. E aínda que non se prodigan moito na nosa lingua, o seu Juventud infinita de 2014 incluía esta oda ao deporte de andar por casa que é Non quito o chándal.

Non quito o chándal
Novedades Carminha
Juventud Infinita (2014)

Nome deportivo (de levantadora de peso búlgara, concretamente) teñen tamén os Boyanka Kostova, pioneiros do trap galego, que nos traen este tema cheo de amor rural.

Leiraz
Boyanka Kostova
Vella canción galega (2018)


Dezaseisavos de final: Das Kapital ou Rebeliom do Inframundo?

Esta eliminatoria poderíase estudar na Facultade de Ciencias Económicas e Empresariais.

Das Kapital xa ten nome de tractado económico, pero ademais esta canción e o álbum homónimo da que se extrae son unha radiografía dos anos da crise económica pola que transitamos no cambio de década.

Grecia
Das Kapital
Grecia (2013)

E para lembrarnos a cara máis dura do sistema temos a Rebeliom do Inframundo, que nos trae esta historia sobre o difícil de atopar traballo que é Móve-te.

Móve-te
Rebeliom do Inframundo
Lume e rebeliom (2016)


Dezaseisavos de final: Terbutalina ou Telephones Rouges?

A nosa eliminatoria máis punk ⚡️

Por un lado temos aos Terbutalina, unha das bandas galegas máis valoradas fóra do noso territorio na actualidade. As súas pastillas de punk rock frenético curan calquer mal, como nos avisan neste Ninguén che quere e podedes comprobar en calquera dos seus concertos.

Ninguén che quere
Terbutalina
Sonido Esteiro (2017)

Por outro atopamos aos xa extintos Telephones Rouges demostrando dende O Grove o ben que lle acae ao garaxe a nosa lingua.

Ei meu
Telephones Rouges
Max Split (2011)


Dezaseisavos de final: Dakidarría ou Dios Ke Te Crew

Aquí crúzanse dous grupos que ao longo destes anos foron converténdose en dous clásicos da nosa escena.

A comezos da década os Dakidarría lanzaban este Terra, un tema no que recorren media Galicia comezando polo Cabo de Ortegal, como podemos ver neste vídeo no que atoparedes a outros grandes da música en galego como Javi Maneiro dos Heredeiros da Crus, Xurxo Souto d’Os Diplomáticos de Montealto ou García MC, por aquela compoñente do grupo que vén a continuación.

Terra
Dakidarría
Utopías emergentes (2011)

Pioneiros do hip hop na nosa lingua son estes Dios Ke Te Crew que rematan a década con ánimos renovados publicando un novo álbum no que inclúen esta auténtica bomba sonora que é A catapulta. 💣

A catapulta
Dios Ke Te Crew
O ciclo da serpe (2019)


Dezaseisavos de final: Esteban & Manuel ou Caxade?

Dúas formas ben distintas de amor nesta 12ª eliminatoria 💔❤️

O namoramento e desengano con autotune de Esteban & Manuel

Ela namoroume
Esteban & Manuel
La banda sonora de tu día a día (2017)

e o AMOR, con maíusculas e letra de Séchu Sende de Caxade.

E isto é o amor
Caxade
E isto é o amor (2016)

E entre as moitas razóns polas que nos namora este vídeo está o feito de que esté coprotagonizado por unha exalumna do noso colexio, Paula Morado. Como non vai ser isto amor! 😍


Dezaseisavos de final: Sabela ou Berrogüetto?

Visitamos agora os dous extremos dos anos dez.

Comezamos coa canción que primeiro se publicou de entre todas as seleccionadas. En xaneiro de 2010 saía á venta Kosmogonías, o derradeiro disco de estudio, xa con Xabier Díaz como vocalista, de Berrogüetto, probablemente a banda de música tradicional galega máis relevante das últimas décadas.

Alalá da noite
Berrogüetto
Kosmogonías (2010)

E para rematar a década, un disco que saía á venda o pasado xoves e co que Sabela, a rapaza d’As Pontes que se converteu na embaixadora da lingua galega nese clásico dos programas de telerrealidade que é Operación Triunfo, pretende facerse un oco na escena da música comercial española. Un álbum que se abre con este Despedida cantado, por suposto, en galego.

Despedida
Sabela
Despedida (2019)


Dezaseisavos de final: Ataque Escampe ou Chicharrón?

Esta eliminatoria é… alternativa. 💿

O tema que vos propoñemos de Ataque Escampe é unha versión do hip hop de (ben se ve) Malandrómeda. E non se trata de desmerecer (para nada!) o variado cancioneiro dos composteláns (a verdade é que nos resultaría complicadísimo escoller calquera outro dos temas que compoñen Violentos anos dez, o álbum co que iniciaron a década, ou dos seus traballos posteriores). Se nos quedamos con esta Festa malandrómica é polo status de auténtico himno que conseguiu acadar ao longo desta década, chegando a se converter na canción máis escoitada na capital de Galicia. Aí queda iso!

Festa malandrómica
Ataque Escampe
Violentos anos dez (2011)

Chicharrón formouse en 2014 en Carballo, e tras publicar un primeiro disco en castelán, o Postal do que se extrae este Suicidio tímido foi o seu primeiro traballo en galego, idioma do que xa non se separarían.

Suicidio tímido
Chicharrón
Postal (2016)


Dezaseisavos de final: Sés ou Os Amigos dos Músicos?

Pop arraigado na tradición na 9ª eliminatoria de dezaseisavos.

Os anos 10 iniciáronse para María Xosé Silvar, Sés, coa publicación do seu primeiro traballo en solitario (aló polo 2011) e rematan coa cantautora coruñesa convertida nunha das máis grandes personalidades da escena musical galega. Aquí traemos unha peza dese primeiro álbum, Admirando a condición:

Non son fada
Sés
Admirando a condición (2011)

Os ourensáns Os Amigos dos Músicos tamén están a pechar en grande os anos dez, coa publicación do seu segundo larga duración, o marabilloso Segundo fogar. Tras moito meditar (a ver quen é capaz de quedarse con unha soa das pezas que compoñen calquera dos seus traballos), optamos por propoñervos este tema do seu primeiro disco:

Fóra do meu control
Os Amigos dos Músicos
Os amigos dos músicos (2016)


A Canción d10z! (3ª semana)

Xa temos gañadores das eliminatorias 5, 6, 7 e 8 de dezaseisavos de final. Desta vez non houbo acordo, posto que se ben Malandrómeda, Heredeiros da Crus e SonDaRúa pasan á seguinte rolda en ambos cadros, o 4º cruce ten distinto vencedor: Iván Ferreiro para o noso alumnado e Guadi Galego para os nosos seguidores en Twitter.

A continuación podedes ver, ademais de como quedan as nosas dúas eleccións, os artistas que subimos ao noso xogo esta 3ª semana:

Alumnado

Twitter

Nestes 4 novos enfrontamentos de dezaseisavos haberá que elixir entre cancións de Sés, Os Amigos dos Músicos, Ataque Escampe, Chicharrón, Sabela, Berrogüetto, Esteban & Manuel e Caxade. Pronto as teredes no noso blog, pero xa podedes gozar delas na nosa lista de reproducción en Spotify.

Lembrade que non só o noso alumnado decide: vós tamén podedes facelo votando nas enquisas que xa temos en marcha en en Twitter!


A Lista d10z!

Vimos de crear unha lista en Spotify para A Canción d10z!. Podedes atopala na seguinte ligazón:Portada.jpg

Polo momento recolle as 16 cancións que iniciaron participación, seguídea para ver como se vai actualizando coas 16 restantes. 🎧


Dezaseisavos de final: Guadi Galego ou Iván Ferreiro

O mar bate contra esta 8ª eliminatoria. 🌊

O mar de Cedeira que nos trae unha das voces máis importantes da nosa música, a de Guadi Galego, nunha canción publicada por vez primeira no ano 2016 e da que vén de gravar unha nova versión acompañada precisamente do outro protagonista deste enfrontamento: Iván Ferreiro.

Cedeira
Guadi Galego
O mundo está parado (2016)

Un mar que tamén está presente na sintonía que o músico vigués compuxo para a cabeceira de Fariña, a serie de televisión que conta a historia do narcotráfico no noso país na década dos 80, e que logrou traspasar as fronteiras da pequena pantalla para convertirse en todo un himno na Galicia de comezos de 2018.

Fariña
Iván Ferreiro
Fariña Misturas (2018)


Dezaseisavos de final: Oh! Ayatollah ou SonDaRúa?

Dúas publicacións de 2018 para a nosa 7ª eliminatoria.

Os Oh! Ayatollah publicaron a comezos do ano pasado o seu agardado LP de debut, que leva por nome Volve a canción protesta e do que foi adianto esta canción homónima, á que acompaña un imprescindible videoclip. 🎄

Volve a canción protesta
Oh! Ayatollah
Volve a canción protesta (2018)

E para protesta a que recollen as letras do grupo de rap ponteareán SonDaRúa. Como mostra, o single que dá nome ao seu EP de 2018.

Liberando mentes
SonDaRúa
Liberando mentes (2018)


Dezaseisavos de final: Heredeiros da Crus ou Nao?

A nosa 6ª eliminatoria de dezaseisavos é territorio de guitarras. 🎸

Se ben poucas bandas do panorama musical galego necesitan menos presentación que Heredeiros da Crus, este tema, incluído no seu álbum de retorno do ano 2013, poderiavos coller co pé cambiado; se non fose porque cumple á perfección aquela máxima sobre a calidade das baladas dos grupos máis duros.

Corasón de carballo
Heredeiros da Crus
Jard Rock con fe (2013)

Acompáñaos outra formación cunha longa carreira ás súas costas: uns Nao que están a piques de poñerlle punto e final a 14 anos de historia como banda cun concerto que celebrarán o vindeiro 7 de decembro en Santiago de Compostela. Como non imos botar de menos a unha banda que é capaz de ofrecernos verdadeiras alfaias rock como esta que vos traemos aquí, na que ademais de Tanxugueiras, colaboran uns SonDaRúa que esta semana temos dobremente presentes.

 

Cultura crítica
Nao
Ata que o lume se apague (2018)


Dezaseisavos de final: Baiuca ou Malandrómeda?

O carácter galego na nosa 5ª eliminatoria de dezaseisavos de final.

Por un lado, a Morriña de Baiuca, o proxecto do catoirán Alejandro Guillán que tan acertadamente mestura a nosa música tradicional coa electrónica.

Morriña
Baiuca
Solpor (2018)

Por outro, que mellor para neutralizar ese sentimento melancólico que o día da festa que nos propón Malandrómeda. A canción é un dos cortes dun dos dous álbumes que publicaron en 2016 e que marcaron todo un fito na música cantada en galego ao alzarse ex aequo co primeiro posto da lista de álbumes nacionais dese ano da prestixiosa revista barcelonesa Rockdelux.

Bótalle caldo (Cumbia malandra)
Malandrómeda
Cada can que lamba o seu carallo (2016)


A Canción d10z! (2ª semana)

O noso alumnado vén de decidir cales son as cancións gañadoras das catro primeiras eliminatorias de dezaseisavos de final: Familia Caamagno, Eladio y Los Seres Queridos, Skandalo GZ e Ezetaerre son as bandas que pasan á seguinte rolda.

E houbo unanimidade, posto que as cancións gañadoras coinciden coas favoritas dos nosos seguidores en Twitter.

Sucederá o mesmo esta 2ª semana? No cadro podedes ver os artistas que entran en xogo, así como os resultados que vos acabamos de comentar:

A canción d10z (Dezaseisavos 2).jpg

4 novos cruces de dezaseisavos no que cancións de Baiuca, Malandrómeda, Heredeiros da Crus, NAO, Oh! Ayatollah, SonDaRúa, Guadi Galego e Iván Ferreiro se enfrontarán por facerse un oco nos oitavos de final. Irémosvolas presentando en sucesivos artigos.

O noso alumnado ten a palabra… e vós tamén. Animádevos a participar na nosa votación paralela en Twitter!