Un ano despois… De flocos.tv a CanleTV
Por fin! Un ano despois de que a Axencia Galega das Industrias Audiovisuais (AGADIC) pechase flocos.tv, o sitio web orientado á difusión do cinema galego, vén de nacer o seu substituto: CanleTV (canletv.agadic.info).
Polo momento semella que se limita a recoller algúns dos títulos que anteriormente puidemos desfrutar en flocos.tv, contando cun total de 86 cintas dispoñibles (lonxe polo tanto dos máis de 300 títulos que almacenaba flocos.tv) que se atopan distribuídas en 5 categorías distintas: ficción, animación, documental, experimental e videoclips (polo de agora baleira). Nunha sexta categoría, adiantos, podemos atopar varias ducias de tráilers.
Esperando que a colección de títulos que nos ofrece CanleTV comece a medrar axiña (non hai ningún filme posterior a 2008), recomendámosvos que a probedes. E se non sabedes por onde empezar, ímosvos propoñer o visionado da cinta de animación (en plastilina) A flor máis grande do mundo, dirixida por Juan Pablo Etcheverry e baseada nun conto do Premio Nobel de Literatura José Saramago (e narrada por el mesmo!).
Pinchade aquí ou na imaxe inferior (o cartel da cinta) e accederedes á páxina de CanleTV onde poderedes reproducila.
Goyas engurrados
O vindeiro sábado celébrase a ceremonia de entrega dos Premios Goya, polo que imos aproveitar para falarvos dunha coprodución galego-catalá que opta a 2 galardóns: o de Mellor Película de Animación e o de Mellor Guión Adaptado. Trátase do filme de animación Engurras, baseada no cómic homónimo de Paco Roca, gañador do Premio Nacional do Cómic 2008.
A cinta, dirixida a un público adulto a pesar de que o feito de ser unha película de animación nos puidese facer pensar o contrario, conta a historia de Emilio e Miguel, dous anciáns recluídos nun xeriátrico.
Emilio, un director de banco xubilado enfermo de Alzheimer, é levado polo seu fillo a unha residencia de anciáns. Confuso pola súa nova contorna e desorientado, sofre regresións a etapas anteriores da súa vida. Emilio atopa un apoio inesperado en Miguel, o seu compañeiro de habitación, e xuntos utilizan todo tipo de trucos para que os médicos non se dean conta da progresiva deterioración de Emilio. Nesta loita por seguir activos como persoas e manter a súa dignidade, os dous construirán unha autentica e profunda amizade.
E como xa están dispoñibles na rede algúns fragmentos da versión na nosa lingua do filme, aquí volos deixamos, para que podades facervos unha idea de por que está a recibir tan boas críticas (mesmo chegou a estar entre as dezaoito preseleccionadas aos Oscars na categoría de mellor película de animación).
Animádevos a participar!
Paula Gamallo é unha alumna do IES Pintor Colmeiro de Silleda que, sen que ninguén lle pedise nada, decidiu escribir un guión sobre o que elaborar un vídeo co que reivindicar “o uso da nosa lingua”. Buscou por Silleda e polo seu instituto unhas cantas amizades que lle axudasen a gravalo e presentoullo ao Equipo de Normalización e Dinamización Lingüística do seu centro. Este é o resultado (aínda o estaban a editar, pero como xa comezou a facerse coñecido, así volo achegamos).
Que vos parece? Animádesvos a participar “na loita polo noso” co voso EDLG?
Aurelia e Serxio
Hoxe vimos de coñecer as nominacións aos Premios Goya 2012, así que é un bo momento para botarlle un vistazo a dúas curtas documentais cunha pequena presenza da lingua galega que estiveron preseleccionadas para estes premios.
A primeira, Aurelia, cóntanos a historia de María Aurelia García Vázquez, unha veciña de Ferreira do Valadouro que nos anos 70 estivo traballando na casa de Ringo Starr, o batería de The Beatles.
Na outra, Percebeiros, Serxio Ces, membro de Os Cempés, fálanos do seu traballo diario, o de percebeiro na costa cedeiresa.
Dúas marabillosas historias; mágoa que, posto que se nota que ambos ser atopan máis cómodos falando en galego, non estean contadas por completo na nosa lingua.
Que, gustáronvos?
Illa Pedra: a primeira audiodescrición para cegos en galego
Illa Pedra é unha curtametraxe realizada por alumnos do máster de dirección cinematográfica da escola de cine de Londres (LFS) que vén de ser noticia porque se trata do primeiro proxecto audiovisual que inclúe audiodescrición para cegos, é dicir, unha dobraxe para invidentes. A audiodescrición permite que un invidente poida salvar a barreira da imaxe a través da inserción de comentarios nos silencios que deixa a trama, do mesmo modo que as persoas xordas poden salvar a barreira do son a través dos subtítulos.
Preme na imaxe inferior para aprender máis sobre este sistema e sobre o proxecto que o pon en contacto coa nosa lingua (vía agalega.info).
As armas da paixón, Pereiro por Pereiro, unha cartografía e cinco poemas
Xa chegou maio! Quedan 14 días para o Día das Letras Galegas, así que vai sendo hora de ir coñecendo máis en profundidade ao homenaxeado deste ano, o poeta Lois Pereiro. Empezamos por As armas da paixón, un marabilloso traballo documental (do que soubemos a través do blogue Caderno de Lingua) realizado polo CPI dos Dices (Rois) e o CPI da Baña (o guión é de Sara Paz e Luís Aldegunde é o editor do mesmo). 15 minutos para saber máis sobre a vida e a obra do poeta monfortino.
Conxuntamente con este traballo, podemos desfrutar doutros tres audiovisuais: Pereiro por Pereiro
, no que é o seu irmán Xosé Manuel Pereiro o que nos fala del, Unha cartografía de Lois Pereiro
, no que o profesor Arturo Casas analiza a súa obra, e Cinco poemas de Lois Pereiro
, unha lectura de poemas a cargo do propio Arturo Casas, Antón Losada, Antón Lopo, Paco Macías e Antón Patiño.
Grazas, compañeiros!
Premios AELG 2011
Xa sabedes que nos gusta estar ao tanto de calquer nova relacionada coa nosa lingua, e como o pasado sábado a Asociación de Escritores en Lingua Galega celebrou a súa Cea das Letras, na que deu a coñecer os galardoados cos Premios AELG 2011, pois hoxe traémosvos a relación de gañadores destes premios que recoñecen as mellores obras editadas (en diversas modalidades) durante o pasado ano.
Así, na categoría de narrativa o gañador foi Manuel Rivas pola súa obra Todo é silencio
, Estremas, de Ana Romaní, foi considerada a mellor obra poética
e, no campo da literatura infantil e xuvenil, o premiado foi Marcos Calveiro, pola súa obra O pintor do sombreiro de malvas (que xa se asomara polo noso blogue hai un tempo).
Tamén foron premiados a obra teatral Flores de Dunsinane, de Manuel Lourenzo
, o ensaio O clamor da rebeldía. Rosalía de castro: ensaio e feminismo, de Pilar García Negro
, e Marga do Val, pola tradución de Randea do alento (da nobel Herta Müller).
A Ramón Nicolás recoñecéuselle a Mellor Traxectoria en Xornalismo Cultural e o blog O levantador de minas, de Alfredo Ferreiro, foi nomeado Mellor Blog Literario. Ademais, a Asemblea de Socios e Socias da AELG premio á Fundación Penzol co premio Institución Cultural e o Premio Cervantes 2006 Antonio Gamoneda fou distinguido como Escritor Galego Universal.
E vos? Lestes xa a algún dos premiados? Pois a que esperades! ;)
18 comidas = 7 premios
Como nos cadrou en plena Semana Santa, aínda non vos faláramos da gala dos Premios Mestre Mateo 2010.
Celebrouse o pasado domingo 20 de Abril, resultando a gran triunfadora da noite a cinta 18 comidas, que obtivo 7 premios, entre eles o de mellor longametraxe e o de mellor dirección. Tamén destacou Crebinsky, con 4 premios, entre os que sobresae o de mellor interpretación masculina protagonista para Miguel de Lira.
No apartado televisivo, como xa apuntábades nas nosas enquisas, Land Rober quedou co premio ao mellor programa de TV e o seu presentador, Roberto Vilar, co de mellor comunicador televisivo.
Co que non acertástedes foi co premio á mellor serie de TV, que foi parar a Matalobos.
Por último, destacar tamén que dúas iniciativas relacionadas coa promoción da lingua galega das que xa vos falamos por aquí, a campaña Orgullos@s do noso, orgullos@s do galego e GalegoLab, conseguiron os premios aos que optaban.
Podedes consultar a lista completa dos premiados na seguinte ligazón, e se queredes ver como foi a gala, que estivo conducida por Xose A. Touriñán e Belén Regueira, podedes facelo aquí.
Noraboa a todos!
EEEiiii!! Imos ao cine?
É que teño gañas de ver Crebinsky, a longametraxe de producción galega que vén de estrearse o pasado venres en salas de toda España tras colleitar un importante éxito no Festival de Málaga, onde foi premiada coa Biznaga de prata ao mellor guión novel e o premio Signis.
As choivas torrenciais provocan a enchente do río, que inunda un pobo. A corrente arrastra ós irmáns Crebinsky e a súa vaca, que aparecen milagrosamente vivos nun lugar da costa.
Crecen alí, ao pé dun faro, a base de sobrevivir recollendo cousas que trae o mar, as crebas. Illados dos acontecementos bélicos que lles rodean, crean o seu propio mundo: Un universo particular de realismo fantasioso.
O ritmo cotiá de convivencia coa súa vaca Muchka, vese alterado cando esta desaparece.
É entón cando os irmáns inician unha busca desesperada que os levará da costa cara ó interior.
Unha road movie auténtica, unha viaxe interior de encontros inesperados, sentimentos ocultos e recordos borrados.
Sen saber onde van, rematan descubrindo de onde veñen.
Rodada entre o Ortegal, Santiago e Portomarín en catro idiomas! (galego, castelá, inglés e alemán (e algunha palabriña en ruso tamén)), a cinta está dirixida por Enrique Otero e protagonizada por Miguel de Lira e Sergio Zearreta. Ademais, conta no seu reparto con actores como Luís Tosar ou Celso Bugallo.
Botádelle un vistazo ao seu trailer
e ao making of.
Se desexades máis información, visitade crebinsky.com. Alí poderedes atopar máis imaxes, máis vídeos, mostras da banda sonora e as últimas novas relacionadas co filme.
Un saúdo!
É ou non é para estar orgullos@s?
Hai un par de semanas falámosvos dos Premios Mestre Mateo 2010. O que non vos dixemos é se nos fixamos na relación de candidatos, podemos atopar varios que o son grazas a actuacións intimamente relacionadas coa promoción da nosa lingua.
Unha desas candidaturas aspira a ser recoñecida como a mellor obra publicitaria. Trátase da campaña Orgullos@s do noso, orgullos@s do galego, da Coordinadora de Equipos de Normalización e Dinamización Lingüística, que na súa vertente audiovisual está composta de dúas pezas: Orgullos@s do galego, que conta coa participación (ao 100%) de Martiño Rivas, Belén Regueira, Antón Reixa, Susana Seivane, Luís Tosar e María Castro
, e En galego, proba e verás, protagonizado por Isabel Risco.
Coñecéronse en Nova York. Ela é galega e el brasileiro e entendéronse perfectamente porque co galego se chega a todo o mundo.
É ou non é para estar orgullos@s?
O Pórtico da Gloria do audiovisual galego
Hoxe coñecéronse os finalistas aos Premios Mestre Mateo 2010. Organizados pola Academia Galega do Audiovisual, estes galardóns veñen premiando dende o ano 2003 o traballo dos profesionais do audiovisual galego. Atópanse divididos en 27 categorías do máis variado, que van dende a mellor longametraxe ata a mellor obra interactiva, pasando polos catro premios da categoría de interpretación ou aqueles reservados a traballos televisivos. Os premios (os gañadores son escollidos democraticamente polos membros da Academia) faranse públicos e entregaranse durante unha gala que terá lugar o vindeiro 17 de abril no Auditorio Municipal de Ourense.
O favorito desta edición é a longametraxe de Jorge Coira 18 comidas. Rodada en galego, español, inglés e macedonio e case sen guión, esta cinta acapara un total de 16 candidaturas, cinco delas para os seus intérpretes.
Séguena de cerca Retornos de Luis Avilés Baquero (15 candidaturas) e Crebinsky de Enrique Otero (12).
E se falamos de televisión destacan as 6 candidaturas que acumula a serie da TVG Matalobos e as 3 doutra serie, Padre Casares, e do programa de humor, música e entrevistas Land Rober.
Pero mellor que seguir categoría a categoría (podedes consultar a relación completa dos finalistas aquí), por que non nos dades a vosa opinión? Polo menos nos premios televisivos, nos que seguro tedes unha…
Os candidatos na categoría de Programa de televisión son o programa de divulgación científica Conexións, o magazine Cultura 10, o espazo viaxeiro Galegos no mundo e o anteriormente citado Land Rober.
Na categoría de Serie de televisión os finalistas son Matalobos, Padre Casares e Para mariñeiros nós.
E os candidatos a mellor comunicador de TV son Roberto Vilar, Terio Carrera, Xosé Ramón Gayoso e Yolanda Vázquez.
Linguas cruzadas: unha viaxe coa mocidade galega dende Castro de Rei á Coruña
Un dos documentais que podiamos atopar en flocos.tv ata o seu peche era este Linguas cruzadas.
Dirixido por María Yáñez e Mónica Ares hai catro anos, ten como fío condutor as historias de cinco rapaces: María, Roli, Fer, Andrés e Lilian. De procedencia diversa, exemplifican cinco formas distintas de achegarse á lingua galega. No camiño atopámonos con outras moitas historias que rematan por conformar un completo retrato da situación do noso idioma entre a mocidade galega.
Aquí vos deixamos o tráiler deste curioso traballo…
para metervos ganas de velo enteiriño.
Réquiem por flocos.tv
Aínda non vos presentáramos neste blogue a web flocos.tv. Tiñamos un artigo a medio escribir, pero quedará sen publicar, porque o pasado luns a Axencia Galega das Industrias Culturais (AGADIC) pechaba este sitio web orientado á difusión do cinema galego.
Flocos.tv funcionaba como unha sorte de videoclube no que se almaceaban máis de 300 títulos do audiovisual galego dispoñibles para a súa visualización en liña. Longametraxes de ficción, de animación, curtas, documentais… todas elas producidas na nosa terra e a maior parte realizadas na nosa lingua.
Este era o aspecto que tiña ata o luns pasado:
E este o que ten agora:
Unha verdadeira mágoa que un proxecto tan interesante como este quede sen concluir (a actualización dos seus contidos interrompérase hai xa un par de anos, quedando máis de 300 pezas por dixitalizar), pero máis aínda que bote o peche. Oxalá este baleiro que deixa flocos.tv sexa temporal e pronto poidamos desfrutar dalgunha nova páxina que tome o seu relevo, pero moito nos tememos que isto non vai suceder (polo menos en breve).
Afortunadamente, todavía existen formas de desfrutar dalgunha destas produccións a través de internet (YouTube, Google videos, Vimeo…) e páxinas que nos guíen na nosa busca, así que… mans á obra!
Modelo Burela
Sobre a base do Proxecto de Innovación Educativa do I.E.S. Perdouro de Burela, elaborouse o Modelo Burela de Planificación Lingüística, un exemplo a seguir de integración social e lingüística nunha vila mariñeira da costa lucense de a penas 13.000 habitantes.
Con este vídeo, extraído dun documental de unha hora e seis minutos de duración que podedes ver íntegro aquí, despedimos a semana.
Xavedes! 
Comentarios recentes