Día Internacional do Libro Infantil e Xuvenil 2013
Coma tódolos anos, hoxe 2 de abril, data de nacemento do escritor dinamarqués Hans Christian Andersen, celebramos o Día Internacional do Libro Infantil e Xuvenil.
Non vos collería sen un nas mans, non? ;)
Hai 15 anos…
nacía en Pontevedra a editorial especializada en literatura infantil e xuvenil Kalandraka.
Parabéns!
E este curso… Roberto Vidal Bolaño
Hoxe, que comezamos un novo curso en secundaria e no noso blogue, aproveitamos para lembrarvos o nome do que será o homenaxeado o Día das Letras Galegas deste vindeiro ano 2013: o dramaturgo compostelá Roberto Vidal Bolaño.
Que teñades todos un bo curso 2012-2013!
In English, please!
O noso idioma segue a romper barreiras. Vimos de coñecer unha interesantísima novidade no eido editorial: a publicación do primeiro gran dicionario bilingüe inglés-galego.
Publicado por 2.0 editora, o Diccionario moderno Inglés-Galego recolle nas súas máis de 20.000 entradas o vocabulario inglés de uso frecuente e as súas correspondencias para a nosa lingua.
A autoría corresponde a un equipo de especialistas en lexicografía da Universidade de Vigo, o equipo CLUVI, responsable á súa vez do Dicionario CLUVI Inglés-Galego, un recurso que está, dende hai tempo xa, dispoñible en liña para todos vós na dirección sli.uvigo.es/dicionario. Pinchade aquí ou na imaxe inferior e premede en Consultar dicionario, tecleade unha palabra en inglés ou en galego e farédesvos unha idea do que vos espera.
Very useful, don’t you think? – Moi útil, non credes? ;)
50 carteis
Outra interesantísima iniciativa que se levou a cabo co gallo do 50 aniversario do Día das Letras Galegas foi o caderno que o diario Faro de Vigo publicou o 17 de maio. Un caderno que fai un percorrido polas figuras homenaxeadas ao longo destes cincuenta anos a través dunha serie de 50 carteis realizados por cadanseu deseñador, carteis que van acompañados dun breve texto obra dun escritor galego da actualidade. A modo de exemplo, aquí tedes o correspondente ao homenaxeado deste ano.
Se pinchades aquí, podedes descargalo ao completo. Facédeo, que paga a pena botarlle un vistazo. [Ademais, dende esta nova da páxina web da Real Academia Galega, podedes descargalos individualmente]
50 anos
Por certo, que o pasado xoves celebramos un Día das Letras Galegas especial, posto que se tratou da quincuaxésima edición da festa das nosas letras. Un cincuenta aniversario que ten símbolo oficial de seu.
Un L de 50 (en números romanos), de letras, de lingua, de libros, rodeado dun corazón que semella latexar de afecto.
Bonito, verdade?
Os premiados da AELG
Seguimos indo de premios. Hoxe trátase dos Premios AELG 2012, que se veñen de fallar na Cea das Letras da Asociación de Escritoras e Escritores en Lingua Galega.
Xa vos informamos no seu momento dos candidatos. Agora traémosvos os premiados nas distintas categorías:
– Narrativa: Laura no deserto, Antón Riveiro Coello, Galaxia
– Ensaio: Vivir, unha aventura irrepetíbel. Biografía de Mª do Carme Kruckenberg, Mercedes Queixas Zas, Galaxia
– Poesía: Leopardo son, Pilar Pallarés, Espiral Maior
– Teatro: Chegamos despois a unha terra gris, Raúl Dans, Xerais
– Literatura Infanto-Xuvenil: Fantasmas de luz, Agustín Fernández Paz, Xerais
– Tradución: Sonetos de Shakespeare, Ramón Gutiérrez Izquierdo, Xerais
– Mellor Blog Literario: As crebas, Miro Villar
– Mellor traxectoria de Xornalismo Cultural en 2011: Bieito Iglesias
María Casares Total
Outros galardóns que se veñen de entregar recentemente (a semana pasada) son os XVI Premios de Teatro María Casares.
E cal foi a gran triunfadora? Pois este foi o ano do Grupo Chévere, posto que a súa obra Citizen Total logrou facerse con 5 dos 8 galardóns aos que optaba, entre eles o de mellor dirección para Xesús Ron e o de mellor espectáculo. As outras favoritas, A Ópera dos tres reás, do Centro Dramático Galego, e Oeste Solitario, de Produccións Teatrais Excéntricas, tivéronse que conformar con dous e tres premios respectivamente.
A relación completa dos gañadores é a seguinte:
– Mellor maquillaxe: Trini Fernández Silva (A Ópera dos tres reás)
– Mellor vestiario: Carlos Alonso (A Ópera dos tres reás)
– Mellor escenografía: Paco Conesa (Piratas, de Teatro do Noroeste)
– Mellor iluminación: Octavio Mas (Oeste Solitario)
– Mellor música orixinal: Xacobe Martínez Antelo (Citizen Total)
– Mellor adaptación – tradución: Avelino González (Oeste Solitario)
– Mellor texto orixinal en galego: Avelino González, Artur Trillo, María Ordóñez e Sechu Sende (Pelos na lingua, de Talía Teatro)
– Mellor actriz secundaria: Mónica García (Citizen Total)
– Mellor actor secundario: Vicente de Souza (Tango, de Sarabela Teatro)
– Mellor actriz protagonista: Patricia de Lorenzo (Citizen Total)
– Mellor actor protagonista: Evaristo Calvo (Oeste Solitario)
– Mellor dirección: Xesús Ron (Citizen Total)
– Mellor espectáculo: Citizen Total
Un Premio Max no Teatro Jofre
O luns pasado tivo lugar no madrileño Teatro Circo Price a cerimonia de entrega dos XV Premios Max das Artes Escénicas, outorgados pola SGAE.
A lingua galega tiña reservado un lugar de privilexio na cerimonia a través da categoría que premia ao Mellor Autor Teatral en Galego. Eran candidatos Santiago Cortegoso, por 0,7% molotov, Roberto Salgueiro por Memoria de Helena e María e Avelino González, Artur Trillo e María Ordóñez, por Pelos na lingua, resultando galardoados estes últimos, por unha obra que, precisamente, ten como eixo principal a nosa lingua.
Así que que mellor momento para recomendárvola, pois o vindeiro sábado tedes unha inmellorable oportunidade para disfrutar deste espectáculo de Talía Teatro. Cóllevos ben cerquiña, no Teatro Jofre.
A cita é ás 21:30 horas, e as entradas xa están á venda a un prezo de 5 €.
Festa da lectura, do libro e da palabra 2012
Ata o martes que vén, aquí, en Ferrol, na Praza da Constitución.
Máis información pinchando aquí.
Premios AELG 2012
E se onte atendíamos ás recomendacións dos editores… como non imos atender ás dos escritores! Hai uns días coñecéronse os finalistas aos premios que anualmente concede a Asociación de Escritoras e Escritores en Lingua Galega, os Premios AELG 2012, que chegan xa á súa décimo terceira edición.
Así, para cada unha das 8 categorías a concurso, e como resultado dos votos dos 417 socios da AELG, saíron finalistas…
… no apartado de Narrativa:
- Extramunde, Xavier Queipo, Xerais
- Laura no deserto, Antón Riveiro Coello, Galaxia
- Non hai noite tan longa, Agustín F. Paz, Xerais
… no apartado de Ensaio:
- Como defenderes os teus dereitos lingüísticos, Carlos Callón, Xerais
- Rosalía de Castro. Estranxeira na súa patria (a persoa e a obra de onte a hoxe), Francisco Rodríguez, Asociación Socio-Pedagóxica Galega
- Vivir, unha aventura irrepetíbel. Biografía de Mª do Carme Kruckenberg, Mercedes Queixas Zas, Galaxia
… no apartado de Poesía:
- balea2, Estevo Creus, Positivas
- Leopardo son, Pilar Pallarés, Espiral Maior
- Todas as mulleres que fun, Andrea Nunes Brións, Corsárias
… no apartado de Teatro:
- A función do tequila, Manuel Guede, Deputación da Coruña
- Chegamos despois a unha terra gris, Raúl Dans, Xerais
- Fábula galénica, Inácio Vilariño, Baía
… no de apartado de Literatura Infanto-Xuvenil:
- Fantasmas de luz, Agustín Fernández Paz, Xerais
- Noutra dimensión, Marica Campo, Galaxia
- O meu gato é un poeta, Fran Alonso, Xerais
… no apartado de Tradución:
- Os trobadores de Occitania, Darío Xohán Cabana, Edicións da Curuxa
- Sonetos de Shakespeare, Ramón Gutiérrez Izquierdo, Xerais
- Versos escollidos (de Wisława Szymborska), Lucía Caeiro, Positivas
… ao Mellor Blog Literario:
… á Mellor traxectoria de Xornalismo Cultural en 2011:
Para informarvos dos gañadores teremos que esperar ao 5 de maio, cando teña lugar a Cea das Letras, na que tamén se entregarán outros dous premios: o premio para a Institución que se caracterizase pola súa contribución á divulgación da literatura galega, que este ano será para os Equipos de Normalización Lingüística dos centros de ensino ( :) ) e os Servizos de Normalización dos concellos; e mais o Premio AELG 2012 “Escritor Galego Universal”, que este ano lle foi outorgado ao escritor e economista José Luis Sampedro.
A Noite da Edición
Nada nos gusta máis que recomendarvos unha boa lectura, e se son os propios editores os que nos propoñen o que para eles é o mellor do ano…
O pasado venres 9 celebrouse en Santiago de Compostela a VII Noite da Edición de Galicia, que organiza a Asociación Galega de Editores, e nela entregáronse os Premios da Edición correspondentes ao pasado ano 2011, así como o Premio Francisco Fernández del Riego, que foi para Xesús Couceiro e a librería da que é propietario (todo un emblema compostelá), por toda unha vida adicada á promoción do libro e a cultura galega.
E pensamos en traervos ata aquí a relación de premiados (por aquilo de dar ideas…).
– Premio Ánxel Casal ao Libro de ficción do ano 2011: Non hai noite tan longa, de Agustín Fernández Paz, editado por Edicións Xerais.
(o xurado concedeulle unha mención especial do xurado á unha obra destinada ao público xuvenil, Centauros do Norte, de Marcos Calveiro, destacando a súa calidade).
– Premio Ánxel Casal ao Libro de non ficción do ano 2011: Obra Gráfica de Conde Corbal (VV.AA.), editado por Nova Galicia Edicións (o xurado soliciou así mesmo que se lle concedera unha manción a O escano baleiro. No Caurel con Uxío Novoneyra, de Xulio Valcárcel, e a Loita de clases, a represión franquista no mar, de Dionisio Pereira)
– Premio Ánxel Casal ao Libro de poesía ou teatro do ano do ano 2011: Poesía completa, de Lois Pereiro, editado por Edicións Xerais.
(con sendas mencións especiais para O Apalpador e a castaña máxica e Canto de Nadal, de Charles Dickens)
– Premio Lois Tobío ao Libro traducido do ano 2011: Sonetos de Shakespeare, traducido por Ramón G. Izquierdo, editado por Edicións Xerais, “pola magnífica tradución e edición crítica e pola súa contribución ao enriquecemento do galego cunha obra universal e imprescindible”.
– Premio Isaac Díaz Pardo ao Libro ilustrado do ano 2011: Contos por teléfono, de Pablo Otero, editado por Kalandraka Editora.
(Lois Pereiro breve encontro, de Jacobo F. Serrano, do que xa vos falamos aquí hai uns meses, recibiu unha mención especial neste apartado).
– Premio Xosefa Iglesias Vilarelle ó libro educativo do ano 2011: As mulleres en Galicia no século XX, de Jesús de Juana e outros, editado por Ir Indo.
(con mención expresa para Un cadro de Velázquez, de Claire D’Harcourt).
Así mesmo, o Premio Xosé María Álvarez Blázquez ao autor ou autora do ano 2011, foi para Xavier Queipo, pola traxectoria da súa obra,
o Premio Rosalía de Castro á iniciativa editorial do ano 2011 para Transformacións de álbums ilustrados en series de animación audiovisual: Os contos do camiño e caracois e o Premio Edición Histórica 2012 ao XXV aniversario de Andavira Editora.
O xurado destacou a calidade de todos os finalistas e solicítalle á Secretaría Xeral de Cultura da Xunta de Galicia, que se merque un exemplar para cada unha das bibliotecas públicas pertencentes á rede de Bibliotecas de Galicia, así que… xa sabedes onde atopalos!
Lectura e agasallos no Día de Rosalía
Como xa puidéstedes comprobar, hoxe conmemórase o 175 aniversario do nacemento de Rosalía de Castro, e a Asociación de Escritores en Lingua Galega quere que o celebremos como se merece. Para iso, propónnos dúas cousiñas ben interensantes.
Por un lado, anímanos en que aproveitemos este día para agasallar aos que temos cerca cun libro en galego e máis cunha flor, nunha sorte de Sant Jordi galego. Por outro, organizan lecturas públicas da obra de Rosalía nas principais vilas e cidades de toda Galicia, d’A Coruña a Vigo pasando por Monforte, A Estrada e, por suposto, Ferrol, onde temos unha cita ás sete da tarde na Galería Sargadelos.
Animádevos! Aínda estades a tempo!
Valentín Paz-Andrade para nenos
Presentámosvos unha novidade editorial ben interesante, sobre todo de cara ao vindeiro Día das Letras Galegas. Xerais vén de editar, a través da sua colección orientada ao público máis novo, Merlín, unha biografía do homenaxeado deste ano, Valentín Paz-Andrade. A vida e deste avogado, empresario, especialista en temas pesqueiros, político, poeta, xornalista… contada de forma amena… pero detallada. E por se fose pouco, unha pequena antoloxía dos seus textos completa este imprescindible volume.
Valentín Paz Andrade. Biografía e antoloxía
Charo Portela Yáñez
Xerais (2012)
10.103.409
10.103.409. Esa é a cifra de exemplares vendidos alcanzada pola editorial Xerais ao remate de 2011. 10.103.409 libros dende a súa fundación o 5 de outubro de 1979: 306.164 exemplares ao ano, 68.731 ao mes, 856 ao día.
O acadar os dez millóns de exemplares vendidos é todo un fito para esta histórica editorial, que tanto leva feito pola normalización da nosa lingua ao longo dos seus máis de 32 anos de existencia.
E cales foron os títulos máis vendidos durante todo este tempo? Pois de entre os máis de 3.000 que levan publicados dende 1979, a propia editorial destaca dúas novelas: O lápis do carpinteiro, de Manuel Rivas, con 81.200 exemplares vendidos,
e, no campo da literatura infantil e xuvenil, Cartas de inverno, de Agustín Fernández Paz, con cerca de 81.000.
Iso si, ningún deles lle fai sombra á gran estrela do catálogo de Xerais. Con… máis de 350.000! exemplares vendidos… o Pequeno Dicionario Xerais! Coñecédelo, non?
A que si?
Agustín Cervantes Paz
Hoxe vimos cunha boa nova, a Biblioteca Virtual Miguel de Cervantes, que se adica á promoción da literatura iberoamericana no mundo mediante o libre acceso a través da rede a máis de 130.000 rexistros bibliográficos, vén de incorporar a un autor das nosas letras ao seu portal de Literatura Infantil e Xuvenil. Trátase do escritor vilalbés Agustín Fernández Paz
Así lucía hoxe o seu portal. Alí poderedes atopar dende un pequeno perfil autobiográfico ata a súa bibliografía, pasando por diversos estudos sobre a súa obra e un completo álbum fotográfico, así como fragmentos de algunha das súas obras, algún deles en galego, outros traducidos ao castelán.
Un lugar privilexiado para un autor privilexiado.
O cunqueirazo da ONCE
Achégase a data (é o vindeiro 22 de decembro) na que se cumpren 100 anos do nacemento do célebre escritor, periodista e poeta galego Álvaro Cunqueiro, motivo polo cal a ONCE súmase á multitude de homenaxes que está a recibir o autor mindoniense adicándolle a ilustración do cupón do próximo sábado 10 de decembro.
Nada máis e nada menos que cinco millóns! de cupóns da ONCE homenaxearán, esparexidos por toda a xeografía española, a Cunqueiro a través dunha fotografía da estatua que o lembra no xardín situado nun dos laterais da catedral do seu Mondoñedo natal.
Acompaña á imaxe a lenda “Álvaro Cunqueiro. Mondoñedo 1911-Vigo 1981. Gallego Universal. Poeta. Escritor. Periodista”. Que digo eu, xa postos a homenaxear, podían telo feito en galego, non? Non lles custaba moito, só unha “l” menos en “gallego” (e tampouco creo que ninguén o deixase de entender por iso).
Se é cultura está en Pontevedra: Culturgal 2011
Marchamos de ponte ata o mércores, pero facémolo cunha proposta. O Pazo da Cultura de Pontevedra acolle dende hoxe venres ata o domingo a que será a IV edición da Feira das Industrias Culturais de Galicia: o Culturgal.
Organizada pola Asociación Culturgal, que agrupa á Asociación Galega de Editores (AGE), a Asociación Galega de Empresas de Artes Escénicas (Escena Galega), a Asociación Galega de Empresas Musicais (AGEM), a Asociación Galega de Produtoras Fonográficas (Agaphono), a Empresas Galegas Adicadas a Internet e ás Novas Tecnoloxías (Eganet) e a Asociación Galega de Produtoras Independentes (Agapi), é un espectacular escaparate no que presentar as novidades dos máis diversos sectores da cultura galega: lanzamentos editoriais teatrais, audiovisuais, discográficos, tecnolóxicos…
Obradoiros, exposicións, contacontos, maxia, teatro, danza, presentacións de libros e discos, conversas… conforman un completísimo programa que podedes consultar aquí.
Crítica positiva: Premios da Crítica 2011
A cidade de Vigo acolleou o pasado sábado o acto de entrega da trixésimo cuarta edición dos Premios da Crítica Galicia.
Os premios abranguían este ano seis modalidades: o premio á Creación Literaria foi para Ana Romaní, polo seu poemario Estremas, o de Investigación para o físico Jorge Mira (si, o das cifras, si) como coordinador do traballo A importancia dá similitude interlingüística e ou bilingüismo equilibrado cando dúas línguas compiten, o de Música para o traballo da pioneira orquestra folk SonDeSeu, o de Iniciativas Culturais ao Proxecto Terra (unha iniciativa impulsada polo Colexio Oficial de Arquitectos de Galicia), o de Artes Plásticas e Visuais a Ángela de la Cruz e, finalmente, o de Artes Escénicas e Audiovisuais á obra Citizen, do Grupo Chévere.
Daríamoslles a noraboa aos premiados, pero creo que é mellor darlles as GRAZAS!
2012, Ano Celso Emilio Ferreiro
O vindeiro 6 de xaneiro, cumpriranse 100 anos do nacemento, na localidade ourensá de Celanova, do poeta Celso Emilio Ferreiro. Por tal motivo, o Parlamento de Galicia vén de solicitarlle á Xunta que declare o ano 2012 como ano de Celso Emilio Ferreiro. A petición, respaldada unanimemente polos tres grupos parlamentarios con representación na cámara galega, vai ser asumida en breve pola Xunta (segundo xa se anunciou dende San Caetano), que ten previsto elaborar un programa de actividades co cal encher de contido esta celebración.
Haberá que estar atentos.
Hoxe é o Día Europeo das Linguas 2011
O Día Europeo das Linguas celébrase o 26 de setembro de cada ano dende que en 2001 se fixo por primeira vez. O seu obxectivo é o de promover a diversidade lingüística e cultural de Europa, coa finalidade de preservala e fomentala.
Sabiades que as 23 linguas oficiais da Unión Europea cos idiomas de máis de 60 comunidades? Pois neste pdf (ou nesta presentación), que recolle o texto proposto polo Consello de Europa para este Día Europeo das Linguas poderedes encontrar moitos máis feitos sobre as linguas do mundo. Por que non lle botades unha ollada para celebralo?
América descubriuna un vilalbés
Onte alegrounos a tarde unha marabillosa noticia: a obtención por parte do escritor Agustín Fernández Paz do VII Premio Iberoamericano SM de Literatura Infantil e Xuvenil.
A concesión de este premio a o autor vilalbés, polo seu “compromiso con los valores humanos universales y su papel determinante en la construcción de una literatura infantil y juvenil en lengua gallega” (podedes ver a acta do xurado aquí) convírtese pois en “un dos primeiros recoñecementos internacionais á literatura galega” (como comentaba en Twitter Manuel Bragado, o presidente da Asociación Galega de Editores). E é que se ben Agustín Fernández Paz é o segundo escritor galego en obter este galardón (tralo ferrolán, recentemente desaparecido, Juan Farias, gañador da primeira edición), poderíase dicir que se trata do primeiro que recibe o premio pola súa traxectoria en galego.
Este premio, dotado con 30.000 dólares, púxose en marcha no ano 2005 e busca recoñecer “a aquellos autores que hayan desarrollado con excelencia una carrera literaria en el ámbito del libro infantil y juvenil en Iberoamérica”. É convocado anualmente pola Fundación SM, o Centro Rexional para o Fomento do Libro en América Latina e o Caribe (cerlalc), a International Board on Books for Young People (ibby), a Organización de Estados Iberoamericanos para a Educación, a Ciencia e a Cultura (oei) e a Oficina Rexional de Educación para América Latina e o Caribe da Organización das Nacións Unidas para a Educación, a Ciencia e a Cultura (unesco/orealc), co obxectivo de “promover la lectura entre los niños y jóvenes de habla española y portuguesa, como una herramienta para el desarrollo social de sus países”.
Está previsto que a entrega do galardón ao escritor galego se celebre en México o vindeiro 29 de novembro, no marco da 25 Feira Internacional do Libro de Guadalajara (que apoia o Premio dende a súa creación), alí onde antes o recibiron o antes mencionado Juan Farias, Montserrat del Amo y Gili, Bartolomeu Campos de Queirós, María Teresa Andruetto e Laura Devetach.
Un vilalbés conquistando América! Noraboa!
Durante o verán (II): Celso Emilio Ferreiro volve a Caracas
Outras noticias que coñecemos durante o período vacacional estiveron dodatas dun carácter moito máis positivo.
Onte achegábamosvos un poema de Celso Emilio Ferreiro, hoxe seguimos falando do autor de Longa noite de pedra, posto que hai uns días soubemos que vai dar nome a unha rúa… en Caracas!
Unha decisión xustificada «No solo en atención a la trayectoria literaria del poeta Ferreiro Míguez, sino que al propio tiempo conocemos el compromiso social y político que acompañó a este insigne poeta a lo largo de toda su prolífera vida» e «el grato recuerdo que dejó en los caraqueños la permanencia en esta ciudad de este laureado poeta (ya fallecido) entre mediados de los años sesenta y principios de la siguiente década». E é que Celso Emilio viviu en Venezuela durante 7 anos, dende 1966 ata 1973.
Agora, o que ata agora era a Cuarta Transversal de Maripérez (rúa que podedes observar na imaxe inferior), levará o seu nome.
Unha merecida homenaxe de cara ao centenario do nacemento do poeta de Celanova, que celebraremos este vindeiro 2012.
Xavedes! 
Comentarios recentes