SingStar…? Galeoke!

Que é o Galeoke? Pois o Galeoke é, como o seu propio nome indica, un xogo de karaoke. O obxectivo do xogo é acumular o maior número de puntos, puntos que obteremos se conseguimos cadrar a nosa voz co tono de voz da canción que esteamos a interpretar.  É dicir, trátase dun xogo na liña do coñecido Singstar™ para Playstation®, se ben o software utilizado neste proxecto está feito en Software Libre.

Pero o que de verdade chama a nosa atención sobre este proxecto é que tódalas cancións que inclúe non só pertencen a artistas galegos, senón que ademais están, todas, compostas en galego.

O primeiro volume do Galeoke saiu á venda o pasado 21 de decembro portando unha heteroxénea selección musical no seu interior. Aí vos van os 16 temas que o conforman:

• Os Resentidos: “Galicia Caníbal”

• Fuxan os ventos: “O Carro”

• Malvela: “O Pirimpimpín”

• Berrogüetto: “Danza de Meirol”

• Projecto Mourente: “Como os Caranguejos”

• Espido: “Santa Muller”

• Narf e Manecas Costa: “Esta Noite”

• Lamatumbá: “Licorcafé”

• Quant: “Pois eu” (Andrés do Barro)

• Treixadura: “Fisterra”

• Xoan Curiel: “Rapás, rapás…”

• Uxía: “As nosas cores” (con Sara Tavares)

• Loretta Martin: “As cores do solpor”

• Os Cempés: “Sara, Sarinha”

• Marful: “Leverelém”

• Os Diplomáticos de Montealto: “Nordés” (con Mercedes Peón)

O Galeoke Vol. 1 vén, ademais, cun código que nos dará acceso á descarga dunha serie de temas extra. E tranquilos, porque se botades en falta algún tema, o Colectivo Galeoke promete unha segunda entrega e ata (se a cousa funciona) unha terceira. Cantamos?